投稿一覽 > 討論內容
《呆佬拜寿》上卷 【關百江撰曲】
日期:2016/03/22 10:54
留言者:關百江
電郵:503944707@qq.com

《呆佬拜寿》(上卷)
(人物: 生-呆佬 旦-妻子)
關百江 撰曲
旦【岐山凤一句】 倦困人
【银河会】已有身孕,更觉时常欲吐频频,千金玉叶身,鸾凰配嫁得个呆人,幼受礼教家规训,唯命是从悲不禁!
【转楼台会】莫说是心心相印,简直啼笑婚姻,月老您繫红线,缘何作弄人?(摄白:唉,盲婚哑嫁,媒人大话呀!)恨怨亦强吞,莫教泪洒衣襟,木已成舟六甲怀孕,愁眉亦要渡日辰。唯望,家山有福,怜佑腹中小宁馨,康乐无恙存慧根,不要是痴憨人。
【花】为人慈母责承肩,天赐娇儿诚福份呀。。。
【叫白】呆佬,呆佬,呆佬呀。。。
生【梦白】唔好哩,唔唔唔好哩。。。
生【用子喉白】我喺要锡淡你,點解唔好嗻?
旦【叫白】呆佬呀!
生【接白】哦,死喇,死喇,我娘子叫我呀,哦黎,黎喇!
【加冠头-醉酒】耳畔闻,娇妻声响震,
【浪白】虾,都唔知阿娘子,佢搵我乜嘢事呢又?
【接唱】娶着了娇妻,三生遇贵人!
【浪白】嘻,我嘅娘子唔单只心地好呀,人仲好靓添嘅啵,嘿!
【接唱】实是缘份,有幸结得婚鬓,不知几咁羡煞旁人!
【浪白】嘻嘻,呢啲呀,咪就喺叫做傻人有傻福喇!嘿!
【接唱】贤良淑妇,匹配善良人,谁及我福份?
【白】嘻,娘子,妳搵我有乜嘢事呢?
旦【白】呆佬,乜你咁耐至出黎架?
生【白】哦,岩先发紧个梦,不知几咁甜嘅,妳又叫醒人喔!
旦【白】发紧乜嘢梦咁交关呀?
生【白】呢,呢个梦就好喇,有个女仔呀,佢喺都話要锡淡我喔!
旦【捏-白】锡吖嗱(才)锡吖嗱(才)咁衰,我以后都唔准你发埋晒的咁嘅梦呀吓!嗱,我話比你听呀,今日喺我阿爹生日,叫你送的礼物去佢呀!
生【白】哇吓(才),咁呢回咪连我都生日埋?
【秋水龙吟】嘿,当堂醒晒唔眼瞓,喜上心头又兴奋,搵番件长衫,着起殊合衬,与娇妻去饮(呢)定然冇話震,
旦【接唱】我内心,至惊你份人憨又“肾”,不禁暗暗着紧,
生【接唱】嘿,请放心,我伴佳人,紧贴钗裙实行及到紧,美属眷要烟韧,我确实喺有幸,结莲并蒂亲。
旦【接唱】爹爹生辰理应祝贺,喺处张罗筹备礼品,嫁夫婿又家贫,想去思来确实费心。
旦【白】(的。。。昌)唉,冇法啦,所谓人情紧过债,呆佬,你一阵拎埋笼田鸡去呀!
生【白】吓,點解要拎笼田鸡去呀娘子?
旦【白】鬼叫我哋穷咩,个啲田鸡喺阿老爷琴晚捉番黎嘅,我阿爹佢就最中意食架喇!
生【白】唏,我就够中意食啦!
旦【白】仲唔快啲去?
生【白】吓妳唔去咩?
旦【白】我唔去罗!
生【白】哎,咁点得架!
【减字芙蓉】呢我认路喺最失魂,仿似沙场临敌陣,
【浪白】我唔记得呀外父住边处咯!
【接唱】我虽然都去过,(唉)一时忆记确头痕,
【浪白】霎时间边记得吖又!
旦【接唱】爹爹佢过生辰,你代为去庆赠,
【浪白】我经已准备好“沓”草纸过你架喇!
旦【接唱】嫁夫痴愚甚,费煞思量费煞心!
生【浪白】呀,娘子呀,不如咁呢!
生【接唱】若确实喺路难寻,妳就毋用伤脑筋,
生【浪白】我每间门口就大嗌一声“外父出黎”,咁咪得啦!
旦【接唱】畀人打都有份,荒唐举措确忧心。
【浪白】你咁人地会打你架,嗱攞住啲草纸,去到巷口转右手,每一间门口派一张,派到最收尾个张入去就喺喇!
生【接白】派到最收尾个张就入去!
旦【接白】喺喇,千祈唔好搞错呀。
生【接白】唏,得喇得喇,包冇撞板嘅,我宜家去喇吓!
旦【接白】米住,仲有呀(的的的)
生【接白】又有乜呀?(昌)
旦【接白】你见到我阿爹,要同佢讲“年年有今日,岁岁有今朝”咁话呀!
生【接白】哦,“年年有今日,岁岁岁有今朝”唏,我晓架喇!
旦【白】虾,懒叻得佢吖! 【入场介】
旦【浪白】自古道“嫁乞随乞,嫁叟(音=手)随叟”,彩凤随鸦,又有乜嘢好怨吖,唉!
【千里明月寄相思】夫君憨直,我做佢枕边人,亦愁莫禁,尤幸欢兴甚,腹内娇儿就快生。唉,唯觉倦困,勉精神亦昏昏,我不若兰房去拥香衾,“瞌”一阵,宁神。
【白】(的。。。昌)唉,我都喺入去唞翻陣先!
【音乐+锣鼓-赶路介】
生【白】嘻嘻嘻,有得饮呀,我几大都行快两步喇喂!咦咦,哇吓乜点解啲“米田共”好似想出仓咁架喂?搵个地方,放低几两先!
【包青天】实个不禁“急”到好紧,事关仓库“米田共”,咦,为何田鸡也叫声阵阵,只只嘈嘈闭“急”如焚?我理得你“急”嗻,我也“急”啵,(不如咁呢)一起“急”去,搵处树荫呢。(嗱)池塘正近,可解厄困,共去欢畅舒心。将心比心,啲“蛤乸”真可悯,(清唱:在笼中,上下躁动)决定放出去,更不再问!
【白】好,一于放晒你地,嗱嗱嗱,讲时讲呀,你地就唔好义气博儿戏,吓,“急”完要返回来至好个啵!哎好啦,去啦,去啦。。。唏喂,喂喂喂喂,点解佢地跳晒落塘呀喂,唔通要洗下身?喂喂喂,乜好似借咗聋耳陈只耳咁呢吓!(的的的。。。才)唏,弊喇。。。
【寄生草】快啲番上莫在塘中长浸,我声嘶力竭佢充耳未闻!(唉死啦)全去全去冇回音,(弊加了啦)想必被爱妻知道实“闹人”,少不了牢骚一餐训,佢“岩”又“篸”唉苦不禁咯!总之呢趟我畀田鸡来“氹”,依家空余两手点庆寿辰?
【白】唓,喺啲田鸡自己唔愿去走咗遮嘛,关我乜事呢又?所谓“船到桥头自然直”喺咪?冇有怕,照去!
【花】 “车到山前必有路”,我都无须伤神强忧困!虽然而家就只剩番得“吉”笼一个(勾)但喺我亲到祝贺,亦可算有心人!
【凤阳花鼓】(好啦)今次受教训,畀田鸡“呃氹”,都喺快“脆”啲赶去,与外父庆寿辰,米再节外生枝庸人自困,看看天色昏暗,莫个把雨淋!
【转中板】呢我呀,品性天真,虽则欠缺聪明,但尔雅昂藏人都唔笨架(啦咕啦咕。。。)嘻嘻!
旦【教子腔】日影斜斜印,迟暮夕阳近,我倚窗轻靠凭,落絮徒自惹恨,怎解觉不安千头万绪纷纷?终日萦怀愁百感,眉锁深深,难报亲恩,真不孝甚,养育劬劳常念记五内印。。。
【白】希望呆佬去拜寿,同爹爹佢好好庆贺生辰呀!
生【叫白】哎呀走呀,哎,走呀。。。
【连环西皮】好彩甩身,好彩甩身,扫帚兜头拍吖落黎,头都拍崩!
旦【沉花】哎呀呀,夫你所因何故,荡魄离魂呀。。。
【白】阿爹冇留你饮咩?【先锋镲】
生【白】饮鬼饮马咩,啲田鸡就有得饮!【先锋镲】
旦【白】点解呀?【重一才】
生【白】就喺解咗至弊,妳听我讲啦!
【秋江别】真激气,我路中肚紧,佢急急叫,我便大发善心啦,(摄白:放咗佢啦吓)谁个不知佢跳晒落塘喔,我长叫不归,实个认真气坏人!
旦【气白】唏,我真喺畀你激死就真咯,啲田鸡“不留”都喺急急声咁叫架啦,呢次真喺唔慌唔急咯!
生【白】哦,娘子,乜妳又急咩?
旦【气白】喺呀!
【士工慢板】我嫁着呆人感慨深,佢傻得实在气坏人,大好鲜花插在,插在一堆粪羞言陈。
生【接唱】(哦,娘子做乜唔出声呢?)我还更畀人打一身,实个丧魂心惊震,逃命飞奔,叹一声谁何这般心狠!
旦【白】吓,你因乜事畀人打呀?【先锋镲】
【双飞蝴蝶衬白】
生【白】唏,一日都喺妳啦,又话每间门口派一张,我派到最收尾张,第七张呀,见到门口有好多人嘅,又好热闹,仲挂住对蓝灯笼,写住享寿七十有九嘅,呢个厅呀又摆住幅大像,有两撇胡须,似十足妳老豆架!
旦【白】睬,似足你老豆就真呀!
生【白】我都算够醒目架啦,我咪立刻对住着起件白长衫个人我话:“嘻嘻,恭喜恭喜,恭喜你年年有今日
(才),岁岁有”,唉,我连“今朝”都未话埋嗻,佢就持住人多虾人少,拍姜咁拍我喇!
旦【白】点解呀,我明明畀咗九张草纸过你啵(才)
生【白】哦。。。喺呀,弊,我先头同田鸡一齐“急”个阵,又用咗两张,吓唔记得扣番个条数添,不过入错咗门口都唔使打人架嘛,唏!
旦【白】鬼同你唏咩呆佬,你入错咗人地做丧事嘅门口呀,哎呀仲恭喜人地年年有今日喔,你真喺底打呀,好在我仲有啲碎银,快啲拎个封筒包住佢,再去过啦,唔好再撞板喇今回!
生【白】吓(才)仲去?(才)呢回咪驱咯,容乜易又再畀人打一身呀又!
【叮咛】完全冇得商量,又怕畀打一身,(嗱)若然妳同行,妳同行,否则蚊都瞓!
旦【白】哎呀,好啦,好啦,我我同埋你一齐去喺啦!
生【白】哇吓,喺咪真呀,喺就好咯,启程咯启程咯!
【锣鼓+音乐】
生【白】娘子呀,
旦【白】吓?
生【白】妳咪撚撚下至得架,行快啲啦,唔喺人地开咗台,我地食少好多架。。。
旦【白】哎呀,得咯,你知我粗身大细吖嘛,行得梗喺慢啲架啦!
生【小潮调】我行行行,
旦【接唱】咪急急冲,
生【接唱】急得我五内又如焚,
旦【浪白】吓?呆佬乜你又急咩?
生【浪白】嘻嘻,心急嗻娘子!
旦【接唱】休心急,莫来回腾,
生【接唱】去迟咗输蚀比人,
生【浪白】娘子,行快两步啦!
旦【浪白】哎呀,都唔差在一时半刻架嘛!
生【接唱】我牵玉手,扶玉人,宴席筵开欢庆寿辰!
旦【浪白】哎呀,呆佬米行住!
生【浪白】呃,乜事呢?
旦【接唱】听吾交带莫失魂!
生【白】哎有啲乜嘢交带呀又?
旦【白】若果阿爹问你,佢话只牛呢排点呀咁,你就话呀,哦,个只老畜生您唔使个咯,我时时都啦佢去食草嘅!你知啦,佢借比你用架,慌你唔用心打理佢呀!
生【白】得啦得啦,咁仲有冇第二件呀?
旦【白】有定啦,嗱第二件,佢问你阿爹点解唔黎饮杯呀咁。。。
生【抢白】哦,唔使妳教喇,我我我话佢欠您钱,惊您追瘦佢,所以唔敢黎,咁咪得咯!
旦【白】唏(才),你米咁直肠直肚至得架,盏我阿爹听见唔安乐嘅嗻,你话呀,你话佢日日都去和尚寺处捉棋,有时仲喺埋和尚寺处瞓添,你记住呀!
生【白】哦,第一件,拉只老畜生去食草!
旦【白】喺!
生【白】咁第二件呢,就去和尚寺处捉棋!
旦【白】喺喇!
生【白】哎,放心啦,我全部记住架喇!
生【鸾凤和鸣】呆人,呆人,全村我名扬传闻,呆少少不算笨,无非想搵我老衬,有娇妻身边我唔震!
旦【接唱】你好睬又够运,三生真真有幸,
生【接唱】积多啲福与份,做人世共妳心心印,
旦【接唱】米学人口似蜜,心牵阿爹祝庆寿辰,
生【接唱】厮守白头冇怨恨,夫妇欢乐脚䟴䟴!
旦【浪白】唏,行啦呆佬!
生【浪白】哦,黎黎黎,黎。。。
【上卷完】

修正或封鎖

Page: [1] < 回上一頁

Re: 《呆佬拜寿》上卷 【關百江撰曲】 ( No.1 )
日期:2016/03/22 11:13
留言者:卡拉ok走字幕
電郵:503944707@qq.com

修正或刪除

Page: [1] < 回上一頁

主題 排列前端
姓名
你的電郵地址
你的網址
現在心情 *心情圖片預覽表 ( 如選擇 "自定心情",請於下一行輸入該圖片網址 )
自定心情圖片網址 :
留言密碼 (刪除或修改留言使用)
內容 (歡笑) (微笑) (大哭) (表情4) (大笑) (表情6) (表情7) (好!) (拍掌) (沉思) (表情11) (表情12) (表情13) (表情14) (表情15) (表情16) (表情17) (表情18) (表情19) (表情20) (表情21) (表情22) (表情23) (表情24) (表情25) (表情26) (表情27) (表情28) (表情29) (表情30) (表情31) (表情32) (表情33) (表情34) (表情35) (表情36) (表情37) (表情38) (表情39) (表情40) (表情41) (表情42) (喜悅) (滿意) (忍笑) (狂笑) (冷酷) (淺笑) (迷茫) (憂愁) (自傲) (驚訝) (大喊) (哭泣) (憤怒) (困惑) (蠱惑) (閉嘴)

   Cookie 保存


- 阿立粵曲天地 -